ELV လုပ်ငန်းရှင်များ၊ Network Installation System Integrator များနဲ့ အထူးသဖြင့် Quantity Surveyor (QS) ညီအကိုများအတွက် ဒီနေ့ အကြောင်းအရာလေးတစ်ခု မျှဝေချင်ပါတယ်။ QS များ နေ့စဉ်အလုပ်လုပ်တဲ့အခါ Project တင်ဒါဝင်ရတာ၊ Client နဲ့ ဈေးနှုန်းညှိနှိုင်းရတာ၊ Proposal တင်ရတာ၊ Contract terms ဆွေးနွေးရတာတွေကို မကြာခဏ ကြုံတွေ့ရပါတယ်။ ဒီလို ညှိနှိုင်းရတဲ့အခါတိုင်းမှာ “ကိုယ့်ဘက်က မနစ်နာဘဲ အကောင်းဆုံးရလဒ်ရအောင် ဘယ်လိုလုပ်မလဲ” ဆိုတာကို စဉ်းစားရပါတယ်။

ဒီနေရာမှာ စီးပွားရေးနဲ့ negotiation ပညာရပ်တွေထဲမှာ အလွန်အသုံးများတဲ့ concept တစ်ခုရှိပါတယ်။ အဲဒါကတော့ BATNA လို့ခေါ်တဲ့ အယူအဆပါ။

BATNA ဆိုတာက Best Alternative To a Negotiated Agreement ဆိုတဲ့ စကားလုံးရဲ့ အတိုကောက်ဖြစ်ပါတယ်။ လွယ်လွယ်နဲ့ ပြောရရင် “လက်ရှိညှိနှိုင်းနေတဲ့ deal မဖြစ်လာခဲ့ရင် ကိုယ်သွားနိုင်တဲ့ အကောင်းဆုံး အခြားရွေးချယ်စရာ” လို့ နားလည်နိုင်ပါတယ်။ Client နဲ့ ဈေးညှိနေတာမှာ ကိုယ်လိုချင်တဲ့ price မရဘူးဆိုရင် ကိုယ်မှာ နောက်ထပ် ဘာ option ရှိသလဲဆိုတာကို ဆိုလိုတာပါ။ အဲဒီ option ကိုပဲ BATNA လို့ခေါ်ပါတယ်။ BATNA ကောင်းတဲ့သူတွေက negotiation table မှာ ပိုအားသာတတ်ကြပါတယ်။

ELV လုပ်ငန်းထဲမှာတော့ BATNA ရှိခြင်းက ပိုပြီး အရေးကြီးပါတယ်။ Cable, Fiber, CCTV, Access Control, Network equipment စတဲ့ ပစ္စည်းဈေးနှုန်းတွေက တစ်နေ့တစ်မျိုး ပြောင်းလဲနေတတ်ပြီး Client တွေကလည်း အမြဲ ဈေးအနိမ့်ဆုံးကို ရချင်ကြပါတယ်။ ဒီလိုအခြေအနေတွေမှာ ကိုယ့်မှာ BATNA ကောင်းကောင်းရှိနေမယ်ဆိုရင် negotiation လုပ်ရတာ ပိုအဆင်ပြေသလို ကိုယ့် profit margin မကျအောင်လည်း ထိန်းနိုင်ပါတယ်။

ဥပမာအနေနဲ့ Fiber Optic Cabling Project တစ်ခုအတွက် quotation တင်ထားတယ်ဆိုပါစို့။ Client က ဈေးအရမ်းချိုချို လိုချင်နေပါတယ်။ ဒီလိုအချိန်မှာ ကိုယ့် BATNA က ဘာတွေဖြစ်နိုင်မလဲဆိုတာကို စဉ်းစားကြည့်ရပါမယ်။

တစ်ခုကတော့ Alternative Client ဖြစ်ပါတယ်။ ကိုယ့်မှာ နောက်ထပ် project negotiation တစ်ခုရှိနေတယ်ဆိုရင် အဲဒါဟာ အားကောင်းတဲ့ BATNA ဖြစ်ပါတယ်။ ဒီ project မရရင်လည်း နောက် project တစ်ခုရှိနေတယ်ဆိုတဲ့ ယုံကြည်မှုရှိလာတဲ့အတွက် negotiation လုပ်တဲ့အခါ စိတ်ဖိစီးမှု နည်းသွားပါတယ်။

နောက်တစ်ခုကတော့ Alternative Supplier ဖြစ်ပါတယ်။ Supplier က ဈေးတက်သွားတယ် ဒါမှမဟုတ် credit term မပေးတော့ဘူးဆိုရင် ကိုယ့်မှာ China, Thailand, Vietnam စတဲ့ နိုင်ငံတွေက alternative suppliers တွေကို သိထားမယ်ဆိုရင် အဲဒါဟာ BATNA တစ်ခုဖြစ်ပါတယ်။ Supplier တစ်ခုတည်းကို မူတည်နေမယ်ဆိုရင် negotiation လုပ်တဲ့အခါ အားနည်းသွားတတ်ပါတယ်။

တစ်ခါတလေ Technology ကိုပြောင်းလဲပြီး BATNA ဖန်တီးနိုင်ပါတယ်။ Client က legacy system တစ်ခုကို insist လုပ်နေတယ်ဆိုပေမယ့် ကိုယ်က Wi-Fi 6 solution၊ IP based system၊ cloud managed system စတဲ့ ပို modern technology ကို အဆိုပြုနိုင်မယ်ဆိုရင် negotiation မှာ alternative option တစ်ခု ထပ်ပေါ်လာပါတယ်။

အခြားတစ်ခါတလေ အကောင်းဆုံး BATNA ဆိုတာ Walk Away လို့ခေါ်တဲ့ “မလုပ်တော့ဘူး” ဆိုတဲ့ ဆုံးဖြတ်ချက်ပါပဲ။ Cost တွက်ကြည့်ပြီး profit မရှိဘူးဆိုရင် အဲဒီ project ကို ငြင်းပယ်နိုင်တဲ့ သတ္တိရှိဖို့ လိုပါတယ်။ Negotiation မှာ အပြင်းထန်ဆုံး BATNA ကတော့ ဒီလို decision ဖြစ်တတ်ပါတယ်။

ဒါဆို ELV QS တစ်ယောက်အနေနဲ့ ကိုယ့် BATNA ကို ဘယ်လိုတည်ဆောက်နိုင်မလဲဆိုတာလည်း အရေးကြီးပါတယ်။ အရင်ဆုံး Market ကို အမြဲလေ့လာနေဖို့လိုပါတယ်။ ဘယ်ပစ္စည်း ဘယ်ဈေး၊ ဘယ်နိုင်ငံက import လုပ်ရင် သက်သာလဲဆိုတာကို အမြဲ update ဖြစ်နေအောင် လေ့လာရပါမယ်။

ဒါ့အပြင် contractor, consultant, supplier, developer တွေနဲ့ relationship ကောင်းကောင်းတည်ဆောက်ထားဖို့လည်း အရေးကြီးပါတယ်။ Project တစ်ခုမရခဲ့ရင် နောက် project တစ်ခုရဖို့ အခွင့်အလမ်းတွေ ပိုများလာနိုင်ပါတယ်။

နောက်ဆုံးအနေနဲ့ ကိုယ့် skill set ကို မြှင့်တင်ဖို့လည်း လိုပါတယ်။ ELV industry က အမြဲပြောင်းလဲနေတဲ့အတွက် IP Surveillance, Smart Building, IoT, Integrated systems စတဲ့ technology အသစ်တွေကို နားလည်ထားမယ်ဆိုရင် ကိုယ့်ရဲ့ ကျွမ်းကျင်မှုကိုယ်တိုင်က BATNA ဖြစ်လာနိုင်စေမှာ ဖြစ်ပါတယ်။

အချုပ်ဆိုရရင် negotiation မှာ အောင်မြင်ချင်ရင် “ဒီ project ကိုပဲ မဖြစ်မနေ ရမှ ဖြစ်မယ်” ဆိုတဲ့ mindset ကို တစ်ခါတလေ ဖယ်ထားဖို့ လိုပါတယ်။ ကိုယ့် BATNA ကို သိထားတဲ့အခါမှာသာ လိုအပ်တဲ့အချိန် “ဒီ price နဲ့ မဖြစ်နိုင်ဘူး၊ ကျွန်တော်တို့ alternative option နဲ့ သွားမယ်” ဆိုပြီး confidence နဲ့ ဆုံးဖြတ်နိုင်မှာ ဖြစ်ပါတယ်။

ELV QS ညီအကိုများအားလုံး negotiation တိုင်းမှာ အောင်မြင်ကြပါစေလို့ ဆုတောင်းပေးလိုက်ပါတယ်။

#ELV #QuantitySurveyor #BATNA #MyanmarConstruction #QS_Tips

#NegotiationSkill #TeamBOH