မီးတွေက တောက်လျှောက်ပျက်၊ လာချိန် ပျက်ချိန်မမှန် ဖြစ်နေတာ ကြာလာတဲ့ခါကျတော့ အိမ်တွေမှာ နေရောင်ခြည် စွမ်းအင်သုံး လျှပ်စစ်ဓာတ်အားပေး စနစ်၊ တနည်း ဆိုလာစနစ် တပ်ဆင်ဖို့ စဉ်းစား လာကြရပါတယ်။ နိုင်ငံတကာမှာက ဆိုလာပါဝါစနစ် တပ်ဆင်ဖို့ အများဆုံး တွန်းအားပေးတာက ကမ္ဘာကြီး ပူနွေးလာမှုနဲ့ စွမ်းအင်စရိတ်စက ကြီးမြင့်လာမှု ဖြစ်ပေမဲ့လို့ ကျွန်တော်တို့ အမိမြန်မာပြည်မှာ ကတော့ နွေရာသီ လျှပ်စစ်မီး ပြတ်တောက်မှုက အဓိက တွန်းအားတစ်ခုလို့ ပြောလို့ ရမယ် ထင်ပါတယ်။ ဆိုလာလျှပ်စစ်ပေးစနစ်ဟာ ထိုက်သင့်တဲ့ အကုန်အကျ တစ်ခု ခံပြီးသွားတာနဲ့ စျေးကွက် ချဲ့ထွင်ရေး ပညာရှင်တွေ ပြောသလို နတ်ရေကန်ထဲ ပစ်ချသလို အစစအရာရာ အဆင်ပြေသွားပြီလား။ အိမ်တွေမှာ ဆိုလာစနစ် တပ်ဆင်မယ်ဆို ထည့်သွင်းစဉ်းစားသင့်တာလေးတွေ ဒီပို့စ်လေးမှာ ဆွေးနွေး ပေးသွားပါမယ်။

တပ်ဆင်မဲ့ နေရာရဲ့ အလေးချိန်ခံနိုင်မှု

အများစုသော ဆိုလာ စနစ်များဟာ ခေါင်မိုးပေါ်မှာပဲ တပ်ဆင်ကြတာမို့၊ လက်ရှိ တည်ဆောက်ထားနှင့်ပြီးသား အဆောက်အဦးရဲ့ ကြံ့ခိုင်မှုဟာ ထပ်တိုးလာမဲ့ ဆိုလာပြားနဲ့ သူ့ကို တပ်ဆင်မဲ့ တပ်ဆင်ပစ္စည်းများ အားလုံးရဲ့ အလေးချိန်ကို ခံနိုင်ရည် ရှိဖို့ ပထမဆုံး လိုအပ်ပါတယ်။  တစ်နေ့တာလုံး နေရောင်ခြည် လုံလုံလောက်လောက် ရရှိနေစေဖို့အတွက် ခေါင်မိုး၏ ထောင့်နှင့် မျက်နှာလှည့်ကိုလည်း ထည့်သွင်းစဉ်းစားသင့်ပါတယ်။

အရည်အသွေးမြင့် ပစ္စည်းများကို ရွေးချယ်ပါ 

သင့်ဆိုလာစွမ်းအင်စနစ် အတွက် အမှတ်တံဆိပ်နှင့် အရည်အသွေးကို ရွေးတဲ့အခါ နာမည်ရှိသော ထုတ်လုပ်သူများထံမှ အရည်အသွေးမြင့် အစိတ်အပိုင်းများကို ရွေးချယ်ရန် အရေးကြီးပါတယ်။ ဆိုလာပြားများ၊ အင်ဗာတာများ၊ ဘက်ထရီများနှင့် အခြားကိရိယာများ အားလုံး အကျုံးဝင်ပါတယ်။ အရည်အသွေးမြင့် စက်ပစ္စည်းများကို ရွေးချယ်ခြင်းအားဖြင့် တာရှည်ခံပြီး ပိုမိုကောင်းမွန်သော စွမ်းဆောင်ရည်နှင့် ဆိုလာစွမ်းအင်စနစ်အတွက် သက်တမ်းပိုရှည်စေမှာ ဖြစ်ပါတယ်။

တော်တည့်မှန်ကန်သော တပ်ဆင်မှုကို လုပ်ဆောင်ပါ

ဆိုလာစွမ်းအင်စနစ်၏စွမ်းဆောင်ရည်နှင့် ဘေးကင်းမှုအတွက် မှန်ကန်သော တပ်ဆင်မှုဖြစ်ရန် အရေးကြီးပါတယ်။ စနစ်တပ်ဆင်ရန် လိုင်စင်ရ အတွေ့အကြုံရှိ ကျွမ်းကျင်ပညာရှင်ကို ငှားရမ်းရန်နှင့် ဒေသတွင်း အဆောက်အဦနှင့် လျှပ်စစ်ကုဒ်များအားလုံးကို လိုက်နာဖို့ အရေးကြီးပါတယ်။ လွဲမှာစွာ တပ်ဆင်မှု ပြုခြင်းကြောင့် စနစ်အား မလိုလားအပ်သော ပျက်စီးဆုံးရှုံးမှု ဖြစ်ပေါ်စေနိုင်ရုံမျှမက အပူလွန် မီးလောင်ကျွမ်းစေခြင်း၊ အသက်အန္တရာယ်အထိ ဖြစ်ပေါ်စေနိုင်တာမို့ အထူး သတိထား တပ်ဆင်ဖို့ လိုအပ်ပါတယ်။

မှန်ကန်သော ပြင်ဆင်ထိန်းသိမ်းမှု လုပ်ဆောင်ပါ

နေရောင်ခြည်စွမ်းအင်သုံးစနစ်ကို တပ်ဆင်ပြီးတာနဲ့ အကောင်းဆုံး လုပ်ဆောင်နိုင်စေဖို့အတွက် စနစ်တကျ ထိန်းသိမ်းထားရန် အရေးကြီးပါတယ်။ ဆိုလာပြားပေါ်  ကပ်ငြိလာတဲ့ ဖုန်မှုန့်များနှင့် အညစ်အကြေးများကို ဖယ်ရှားဖို့ ပုံမှန်သန့်ရှင်းရေးပြုလုပ်ခြင်းအပြင် အခြားသော အစိတ်အပိုင်းများကို အချိန်အခါအလိုက် စစ်ဆေးခြင်းနှင့် ပြုပြင်ထိန်းသိမ်းခြင်းတို့ လုပ်ဆောင်သင့်ပါတယ်။ သင့်လျော်သော ပြုပြင်ထိန်းသိမ်းမှုသည် သင့်စနစ်၏ သက်တမ်းကို ရှည်စေပြီး စနစ်ရဲ့ စွမ်းဆောင်ရည်ကို မြှင့်တင်ပေးနိုင်မှာ ဖြစ်ပါတယ်။

စွမ်းဆောင်ရည်ကို စောင့်ကြည့်ပါ

နောက်ဆုံးအနေနဲ့ ဆိုလာစွမ်းအင်စနစ်ရဲ့ စွမ်းဆောင်ရည်ကို ပုံမှန်စောင့်ကြည့်ဖို့ အရေးကြီးပါတယ်။ စွမ်းအင်ထုတ်လုပ်မှု ပမာဏကို စောင့်ကြည့် မှတ်တမ်းတင်ခြင်း၊ ချွတ်ယွင်းချက်များ သို့မဟုတ် မူမမှန်မှုများကို စစ်ဆေးခြင်းနှင့် လိုအပ်သလို ချိန်ညှိခြင်းများ ပါဝင်ပါတယ်။ စနစ်ရဲ့ စွမ်းဆောင်ရည်ကို စောင့်ကြည့်ခြင်းသည် ပြဿနာများကို လျင်မြန်စွာ ဖော်ထုတ်ဖြေရှင်းနိုင်စေရန် ကူညီပေးနိုင်ပြီး စနစ်ထိရောက်မှု အမြင့်ဆုံး ဖြင့် လည်ပတ်နေစေရန် သေချာစေမှာလည်း ဖြစ်ပါတယ်။

အချုပ်အားဖြင့် အိမ်တွင် ဆိုလာဓာတ်အားပေးစနစ်ကို တပ်ဆင်ခြင်းသည် ကြီးကျယ်သော ရင်းနှီးမြှုပ်နှံမှုတစ်ခု ဖြစ်နိုင်သော်လည်း စနစ်သည် ဘေးကင်းပြီး အကောင်းဆုံး လုပ်ဆောင်နိုင်စေရန် သေချာစေရန်အတွက် လိုအပ်သော ကြိုတင်ကာကွယ်မှုများနှင့် ဂရုပြုရန် အရေးကြီးပါတယ်။ အထက်မှာ ဖော်ပြခဲ့တဲ့ အကြံပြုချက်လမ်းညွှန်ချက်များကို လိုက်နာခြင်းဖြင့်၊ မိတ်ဆွေရဲ့ ဆိုလာစွမ်းအင်စနစ်သည် နောင်နှစ်များအတွင်း သန့်ရှင်း၊ ထိရောက်ပြီး ယုံကြည်စိတ်ချရသော စွမ်းအင်ကို ပေးဆောင်နိုင်စေဖို့ ကူညီပေးနိုင်မှာလည်း ဖြစ်ပါတယ်။